Arsenal កំពុងតែបង្កើនការតាមប្រមាញ់យ៉ាងខ្លាំងក្លាលើខ្សែប្រយុទ្ធវ័យក្មេង Kenan Yildiz របស់ក្លឹប Juventus បន្ទាប់ពីការខកខានមិនបានចុះកិច្ចសន្យាជាមួយកំពូលតារាឆ្នើម Vinicius Junior របស់ Real Madrid។ កីឡាករអន្តរជាតិតួកគីរូបនេះ ត្រូវបានគេរាយការណ៍ថា បានត្រៀមខ្លួនរួចជាស្រេចក្នុងការដាក់សំណើរសុំចាកចេញពីទឹកដីអ៊ីតាលី ដើម្បីសម្រេចបំណងប្រាថ្នាក្នុងការផ្លាស់ទៅរួមរស់ជាមួយក្រុម “កាំភ្លើងធំ” នៅភាគខាងជើងទីក្រុងឡុងដ៍ នាទីផ្សារដោះដូរកីឡាករនារដូវក្តៅនេះ។ទោះជាយ៉ាងណាក៏ដោយ កិច្ចព្រមព្រៀងមួយនេះមិនមែនជារឿងងាយស្រួលឡើយ ដោយសារតែក្លឹបសេះបង្កង់ Juventus បានកំណត់តម្លៃខ្លួនរបស់គេខ្ពស់កប់ពពក រហូតដល់ទៅ ១២០ លានផោន។ តម្លៃនេះនឹងក្លាយជាការសាកល្បងដ៏ធំមួយចំពោះស្ថានភាពហិរញ្ញវត្ថុរបស់ Arsenal។

មូលហេតុដែល Yildiz ក្លាយជាគោលដៅកំពូលរបស់លោក Mikel Arteta

បន្ទាប់ពីមានព័ត៌មានផ្លូវការថា Vinicius Junior បានសម្រេចចិត្តបន្តកិច្ចសន្យារយៈពេលវែងជាមួយអធិរាជស Real Madrid កាលពីសប្តាហ៍មុន លោក Mikel Arteta បានបង្វែររ៉ាដារបស់លោកភ្លាមៗទៅរកគ្រាប់ពេជ្រវ័យក្មេងរបស់ Juventus គឺ Kenan Yildiz។តាមប្រភពពីអ្នកសារព័ត៌មានល្បីឈ្មោះ Sacha Tavolieri បានឱ្យដឹងថា ខ្សែប្រយុទ្ធវ័យ ២១ ឆ្នាំរូបនេះ គឺជា “កីឡាករក្នុងក្តីស្រមៃ” ដ៏ពិតប្រាកដរបស់លោក Arteta។ កន្លងមក ថ្នាក់ដឹកនាំរបស់ Arsenal ក៏ធ្លាប់បានធ្វើការសាកសួរជាផ្លូវការទៅកាន់ Juventus អំពីលទ្ធភាពនៃការទិញយកកីឡាកររូបនេះផងដែរ ប៉ុន្តែត្រូវបានក្លឹបអ៊ីតាលីបដិសេធភ្លាមៗ ដោយអះអាងថាគេជាកីឡាករដែលមិនមែនសម្រាប់លក់ដាច់ខាត។ប៉ុន្តែស្ថានភាពនៅពេលនេះបានផ្លាស់ប្តូរទាំងស្រុង ខណៈដែលសាមីខ្លួន (Yildiz) បានបង្ហាញជំហរច្បាស់លាស់ថាចង់ចាកចេញ ដែលនេះជាឱកាសមាសសម្រាប់កាំភ្លើងធំក្នុងការបើកការចរចាម្តងទៀត។